Nuan jelau, japah kawan pitir tang ko, lo idun bak menak persatuan lo Mato-Daro tang Miri eh. Tapi may ta'o kubah gaya bak menyetat. Ubak kawan yah, lo Imi sieng. Nah telo gugam Imi, sebab Imi nuan ta'o jumit hal persatuan eh. Ngam-ngam idun melabak tang ko, 'sai aro telai radan Imi wak kerjah Forest? ubak idun. Ko melabak agik tang idun, 'Imi an aro inyang mo? Wak tena'o ko, ko japah mak wak radan Imi kerja Forest tang Miri eh.
Nyadin, stat keman lau idun, kamik pun gemupol 2-3 lawas kawan-kawan wak samah keman Mato-Daro. Gugam samah tutang anum sambil kelakar pasal 'kubah gaya bak menak persatuan lo anak Mato-Daro'. Hampir tiap-tiap minggu kamik betemu tang keday kopi, bercerita abay berbincang kubah gaya bak menak persatuan wak dicadang kamik eh. Pemuday sengan cerita, udah be-gelen anum kopi tang kamik semuah semata-mata berfikir kubah gaya 'bak menyetat' persatuan idun.
Keman idunlah kamik semuah 7 lawas stat gemupol apah, pegam betemu tang lebuh kawan tang Miri eh. Bak menak da'o agik sengan, 'pertemuan eh an sebagai pertemuan anak Mato-Daro, Miri'. Wang kamik semuah betemu idunlah kamik berunding sama debay, pinyang pendapat abay buah fikiran keman lo jipo, suku sakat semuah wak labik malam idun. Atang ubak to lakay daneh sabay, 'telo mesti mungguk samah akah telo merancang bak menak sesuatu, apatah lagik amun hal idun hal ayang'. Sebab akah telu kenah samah-samah, 'wak berat nyadin liang, wak susah nyadin senang'. Dang atang ubak to lakay sabay,'telo may kenah mudip adip wang dunia eh, walau gagah atau panai sekalipun, telo mesti perlu to'o kik'gak.
Tapi nuan jaong masaalah, pasal persatuan wak pernah ditubuh oleh lo jipo kik daneh sabay. Persatuan idun 'sengaan nuan tapi may sebak'. Udah katah, hampir 6-7 taun udah. Banus may ta'ah beritah. Nyadin kamik 7 lawa wak becadang bak menak ubas persatuan eh nien, serba salah. Medut persatuan wak daneh idun agik nuan, udah didaftar atau pun may. Sebab, akah persatuan idun agik nuan atau udah didaftar, bererti kamik may kenah menak ubas.
Nyadin, kamik pun menibah YB. En. Abu Seman (YB Bahagian Mato, bak melabak abay menueng keman bak idun debay, hal berkaitan persatuan daneh sabay. Sebab mungkin idun ta'o hal eh. Atau, kamik nyabik kebenaran keman YB idun bak menak persatuan ubas, terus melantik AJK ubas.
Nasib kamik da'o, YB Abu Seman nang spoting. YB sanggup labik keman Kuching semata-mata bak menueng masalah kamik anak Mato-Daro tang Miri eh. Akah may salak YB labik tang Miri 18.01.2010, malam Sabtu. Malam idun kamik begumpol tang lebuk Malik. Idak gak apah labik, bak betemu YB Abu Seman wak atang idun.
Kamik pun pitir tang YB wakno wak di niat wang na'ay kamik katah eh. May kik, adalah bak menak persatuan. Nyadin YB Abu Seman pun tujoh mandat supaya kamik menak ubas, buyak wak daneh sabay udah may kenah bak agik. Tapi ubak idun, masok samah lo keman bahagian Igan gak, sebab Igan adalah bah ibak Mato-Daro. Kamik bukan may setuju, tapi akah kenah, biarlah persatuan eh bak lo Mato-Daro mak, sebab kamik luk bidang kuasa lo Mato-Daro wang persatuan idun na'ah. Sebab jerak buyak persatuan wak daneh sabay. Wak daneh sabay buak monopoli lo Igan, sedangkan ubak lo ta'o pasal persatuan daneh iduh pubak, masa 'pemilihan AJK', labik japah pun radan lo Igan wang senarai AJK, tapi bila udah nuan protem, 2/3 jawatan AJK radan lo Igan. Kubah gaya nyadin besidun. Maka, keman hal idunlah nuan apah lo balai may setuju. Tapi, kubahlah gaya telo bak menak, telo mesti terimak gak lo Igan eh.
Maka, stat keman malam YB Abu Seman tujoh mandat idunlah kamik pinyang apah, gemupol lo anak Mato-Daro. Bukan main bersemangat agik kamik semuah. Lebih-lebih agik kamik 7 lawas, wak bolehlah dianggap 'Pengasas' persatuan ubas eh.
Nota: Akan disambong tang topik kik.....
No comments:
Post a Comment